मंदिरचे विषयी

सदर मंदिरात तळमजल्यावरील प्रशस्त दालनात समोरच थोर साई भक्त श्रीमान विजय हरी वाडेकर यांनी महाराजांच्या चरणी अर्पण केलेल्या लाकडी पलंग व गादीवर सद्गुरु श्री गजानन महाराजांची प्रतिमा मोठ्या तसबिरीच्या रुपात स्थापन झाली. आज महाराजांची जी पालखी आहे ती सुध्दा श्री. विजय हरी वाडेकर यांनीच महाराजांच्या चरणी अर्पण केली आहे. मंदिराच्या वरील मजल्यावर श्रींच्या मूर्ती प्राणप्रतिष्ठापनेसाठी विशाल चौथरा तयार करण्यात आला. या चौथऱ्याचे रविवार दि. ५ जानेवारी २००३ रोजी पिंडीका पूजन करण्यात आले. मंदिरातील श्रींच्या मूर्तीसाठी प्रतिष्ठानच्या सदस्यांनी जयपूर येथे भेट देऊन एक अत्यंत विलोभनीय व अभय मुद्रेतील सुंदर अशी मूर्ती अखंड संगमरवर दगडात घडवून घेतली. या श्रींच्या मूर्तीची दि. ९.१.२००३ रोजी सारसबागेपासून भव्य शोभायात्रा काढून अत्यंत उत्साहात व वाजतगाजत मूर्ती मठामध्ये आणण्यात आली. या श्रींच्या मूर्तीच्या प्रतिष्ठापनेचे सर्व धार्मिक कार्यक्रम सोमवार दि. १०.१.२००३ ते बुधवार दि. १५.१.२००३ या काळात विष्णूयाग, गणेशयाग इ. सर्व भक्तांच्या अतिशय उत्साहपूर्वक व भक्तीमय वातावरणात संपन्न झाले व गुरुवार दि. १६ जानेवारी २००३ रोजी शुभ मुहूर्तावर एका वैभवशाली व देखण्या समारंभात विधीपूर्वक थाटामाटाने श्रींच्या मूर्तीची प्राणप्रतिष्ठा करण्यात आली. पुण्यनगरीच्या अध्यात्मिक वैभवात भर घालणारे अतिशय सुंदर भव्य श्री गजानन महाराज यांचे मंदिर साकार झाले.